Isang makahuluga’t mapayapang pagdiriwang ng Pasko sa ating lahat!

Sa pagdiriwang ng sambayanan ngayong Kapaskuhan, hiling ng Komisyon na ang bawat Pilipino ay masayang ginugunita ang kapanganakan ni Hesukristo kasama ang kanilang mga mahal sa buhay. Bukod sa sayang hatid ng mga aginaldo, mga dekorasyon at mga awiting pamasko, hangad namin ang isang mapayapang okasyon ng pagmamahala’t pagbibigayan.

Subalit hindi lingid sa ating kaalaman na marami tayong mga kababayang hindi kapiling ang kanilang mga kapamilya at nahaharap sa matitinding pagsubok ngayong taon. Taos pusong panalangin para sa mga asawa, anak, kapatid at magulang na naulila ng mga biktima ng karahasan; mga pamilyang napilitang lumikas dahil sa kaguluha’t kalamidad; at mga kamag-anak na patuloy na naghahanap ng hustisya. Kahit sa ating mga mumunting kakayanan, nawa’y magsilbi tayong ilaw para sa mga mas nangangailangan ng liwanag sa kanilang mga buhay.

Sinubok man ang bansa ngayong taon ng mga matitinding hamon, mahalagang kilalanin at mas panghawakan natin ang mga tagumpay, maliit man o malaki, tungo sa pagkamit natin ng tunay na kaunlaran at pagkakaisa. Patuloy nating pagkuhanan ng lakas ang bawat isa upang harapin ang papasok na taon nang may pag-asa. Nawa’y mahinto na ang lahat ng patayan at tuluyang mapanagot ang mga may sala kasama ng pagbibigay pansin ng pamahalaan sa mga tunay na suliraning kinakaharap natin gaya ng matinding kahirapan at kawalang hustisya. Maging panahon sana ito para sa ating lahat na magnilay, lalung-lalo na sa ating mga namumuno, kung papaano natin mapapaghusayan ang paglilingkod-bayan at pagtataguyod ng interes ng Pilipinas higit sa anupaman.

Hindi lamang ngayong Pasko kundi sa pang araw-araw nating buhay ay maghari sana ang diwa ng pagmamalasakit at pagkalinga sa kapwa. Maging huwaran nawa ang bawat isa sa atin sa pagpapahalaga’t paggalang sa buhay at karapatang pantao ng lahat. Hiling ng Komisyon na manaig lagi ang katotohanan sa ating bayan at mailayo tayo sa anumang uri ng kapahamakan.

Muli, maligayang pasko at manigong bagong taon!