Ngayong araw, 12 Abril 2020, nakikiisa ang Komisyon sa mga Karapatang Pantao sa buong mundo sa paggunita ng Pandaigdigang Araw ng mga Batang Lansangan. Ang araw na ito ay pagkakataon natin na maitampok ang hamong kinakaharap ng mga batang lansangan, lalo na ngayong sumasailam tayo sa isang pambansang krisis pangkalusugan.
Lansangan ang nagsisilbing tirahan, palaruan, at lugar para makapaghanap-buhay ang daan-daang libong bata sa iba’t ibang bahagi ng Pilipinas. Patuloy na tumataas ang bilang na ito dulot sa patindi nang patinding kahirapan sa bansa. Dahil sa panganib na sadyang kaakibat ng lansangan, hindi kaila sa atin ang reyalidad na araw-araw silang nahaharap sa banta ng sapilitang paggawa, pisikal at sekswal na pang-aabuso, prostitusyon, maagang pagbubuntis, at iba’t ibang mapanganib na sakit gaya ng COVID-19.
Dagdag pa sa mga nakaambang na karahasan, walang akses sa edukasyon at impormasyon, tamang nutrisyon at malinis na tubig, atensyong medikal, at proteksyon ang mga batang lansangan. Karamihan sa kanila ay kabilang sa mga pamilyang walang regular na pinagkukunan ng kabuhayan o di kaya’y abandonado na mula pagkabata. Iba’t ibang lebel ng bulnerabilidad ang binabaka nila araw-araw upang mabuhay.
Kumplikadong sitwasyon na ang kinalalagyan ng mga batang ito dahil sa sala-salabit na isyung kanilang kinakaharap sa murang edad. Gaya ng idinadaing ng kalakhang maralitang Pilipino, walang kasiguruhan na mayroong regular na pagkukunan ng pagkain, panggastos, at gamot ang mga taong nakadepende sa lansangan, lalo na’t maigting ang pagpapatupad ng enhanced community quarantine sa bansa.
Sa pagtugon ng pamahalaan sa pagsugpo sa COVID-19, panawagan ng Komisyon na mabigyang pansin ang mga bulnerabilidad na nararanasan ng mga batang lansangan. Kinikilala natin na may mga interbensyon ang pamahalaan noon pa man upang mapabuti ang sitwasyon ng mga batang ito subalit marami pang kinakailangang gawin.
Sa pagtutulungan ng iba’t ibang ahensya ng gobyerno, hiling ng Komisyon na masigurong may maayos at ligtas na mauuwian ang mga batang lansangan, at regular na maaabot ng ayuda mula sa mga lokal na pamahalaan. Mahalagang mabigyang diin din ang tumataas na bilang ng insidente ng pang-aabuso laban sa babae’t bata dulot ng iba’t ibang tensyo’t problema sa loob ng bahay ngayong ipinagbabawal ang paglabas. Dagdag pa, tumataas rin ang insidente ng pagmamalabis laban sa mga batang lumalabag sa ipinapatupad na curfew. Kailangang may mga matatakbuhan ang mga batang ito para sa proteksyon.
May pambansang krisis pangkalusugan man o wala, hindi dapat natin makalimutang tugunan ang mga karapatang pantao ng mga bata, lalung-lalo na ang mga nasa lansangan. Mananatiling tapat ang Komisyon sa pagmamatyag sa mga pang-aabuso sa karapatang pantao habang nakikiisa tayo sa pagpigil sa pagkalat ng nakamamatay na sakit. ###