Mayroon di-umanong mga grupo, indibidwal, at maging mga abogado na hangad na manlamang at mangikil ng pera sa mga denied claimants ng Human Rights Victims’ Claims Board (HRVCB) kapalit ang pagproseso at/o pag-apela ng claims para sa pinansyal na reparasyon. Ito ay hindi totoo at isang uri ng scam at panloloko. Mahalagang maging mapanuri at sumangguni lamang sa official sources katulad ng Commission on Human Rights (CHR).
Muli naming binibigyang-diin at pinapaalalahanan ang mga biktima, kanilang pamilya, at ang publiko na nagsarado na ang HRVCB. Wala nang bagong claims o appeals ang maipo-proseso dahil dito. Wala ring bagong ahensya o opisina na naitayo upang mag-proseso ng claims at/o appeals para sa reparasyon at kumpensasyon. Nakumpleto na ng HRVCB ang pagtukoy ng mga legitimate claimants at nagsagawa na rin ng pamamahagi ng pinansiyal na reparasyon.
Nais rin namin bigyang-linaw na walang masama sa pagtatayo ng asosasyon sapagkat ito’y isang karapatan. Subalit maging mapanuri at mag-ingat sa mga sasalihang grupo. Tiyakin na ang sasalihan ay hindi sindikato dahil mayroong mga oportunistang naghahangad na samantalahin ang mga denied claimants para pagkakitaan at kikilan.
Nasa pangangalaga ng Landbank ang natitirang pondo ng HRVCB sa ilalim ng trust fund na Human Rights Victims Reparation Fund. Ito ay nakalaan at eksakto lamang para sa natitirang 177 tsekeng hindi pa na-claim o na-encash. Karamihan sa mga ito ay dahil pumanaw na ang biktima at hindi pa na-update ang kanilang record. Naipasa na ng House of Representatives ang kanilang bersyon ng joint house resolution na naglalayong i-extend ang validity ng funds para sa nabanggit na 177 na tseke. Samantala, hinihintay na rin na maipasa sa senado ng kanilang bersyon.
Maging mapagmatyag tayo laban sa mga gawaing naglalayong biktimahin muli ang mga dati nang biktima ng mga paglabag sa karapatang pantao sa ilalim ng diktaduryang Marcos. I-report agad sa kapulisan at/o sa CHR ang anumang gawain o impormasyon patungkol sa ganitong uri ng scam. ■