Simula ngayong araw, ika-1 ng Mayo 2020, ang ibang lokalidad sa Pilipinas ay mapapasailalim na sa general community quarantine matapos matukoy na low hanggang moderate na ang panganib ng pagkalat ng coronavirus disease 2019 (Covid-19) sa mga nasabing lugar, habang ang ilan ay magpapatuloy sa mas mahigpit na restriksyon ng enhanced community quarantine.
Sa anumang sitwasyon, patuloy na nararamdaman ng ating mga kababayan, lalo na ang mga kapos sa buhay, ang epekto ng kawalan ng trabaho at kabuhayan, maging ang panganib na dulot ng pandemiya para sa mga manggagawang itinuturing nating mga frontliners.
Kaya ngayong Araw ng Paggawa, ipinapaabot ng Komisyon sa mga Karapatang Pantao ang pagpupugay sa mga manggagawang patuloy na sumasabak sa hamon ng Covid-19 at tumutulong maibsan ang epekto nito sa bawat Pilipino—mga doktor, nars, siyentista, mga nagtatrabaho sa mga laboratoryo, naglilinis sa mga ospital, mga magsasaka, mangingisda, silang mga nasa industriya ng pagkain, factory workers, mga drayber, delivery crew, at iba pang frontliners sa pribado at pampublikong sektor.
Ngunit ang mas higit na pagpupugay sa kanila ay ang pagkilala sa kanilang pangangailangan.
Halimbawa nalang sa hanay ng medikal na propesyon, patuloy na tumataas ang mga kaso ng nahahawa sa Covid-19 dahil sa kakulangan ng proteksyon at kagamitan. Bukod dito, kailangan ring pagtuunan ng pansin ang kalusugan ng kanilang pangangatawan at isipan batid ang pagdami ng mga pasyenteng kailangan tulungan.
May ibang ring mga manggagawa na walang kasiguraduhan kung kailan makakapagtrabaho muli, lalo na silang mga umaasa sa arawang kita at mga nasa industriya na hindi pwedeng gawin ang trabaho mula sa kani-kanilang tahanan.
May mga napapabalitang sumusubok lumabas para maghanap-buhay sa kabila ng quarantine para lamang may pangtustos sa araw-araw.
Ang iilan sa ating mga kakabayang Overseas Filipino Workers ay napilitan nang magsiuwi bilang epekto ng lockdowns at kawalan ng trabaho sa ibang bansa. May mga negosyo na inaasahan ng ating mga kababayan para sa kani-kanilang trabaho ang humaharap rin sa walang kasiguraduhan ng pagbangon dahil sa kawalan ng kita.
Iilan lang yan sa mga reyalidad na kinakaharap ng ating mga manggagawang Pilipino.
Sa pagbubukas muli ng ibang negosyo sa ilalim ng general community quarantine, sana ay isaalang-alang ang pagbalanse sa pangangailangan maghanap-buhay at pagpapanatiling ligtas ang buhay ng ating mga manggagawa.
Ang mga mekanismo at programa mula gobyerno para matugunan ang mga epekto sa pangkabuhayan ng mga nananatili sa enhanced community quarantine ay higit na kinakailangan.
Inaasahan natin na pabibilisin ng ating pamahalaan ang pagtugon sa mga isyu ng ayuda para matustusan ng ating mga manggagawa ang kanilang mga pangangailangan at ng kanilang mga pamilya habang hindi pa natatapos ang pandemiya.
Ang kawalan ng hanapbuhay ay lalong nagsasadlak sa ilang mga Pilipino sa kahirapan. Ang karapatang magkaroon ng trabaho at sapat na kabuhayan ay importante sa pagpapanatili ng dignidad ng isang tao. Sa paglutas natin sa pagsubok ng Covid-19, wala sanang maiiwan sa pagbangon, higit lalo na ang mga walang boses, isinasantabi, at kadalasang nakaliligtaan sa lipunan. ###