Muli naming ipinapahayag ang lubos na paghihinagpis, pagkundena, at pakikidalamhati sa nangyaring kalunus-lunos na pagpaslang sa 16-taong gulang na si Christine Lee Silawan ng Lapu-lapu City. Walang puwang sa ating lipunan ang ganitong kalapastanganan laban sa isang inosenteng dalagita. Agad na nagpadala ng Quick Response Team ang CHR noong 11 March 2019 para tutukan ang agarang paglutas sa kasong ito. Hangad natin na mapanagot ang mga may sala at maramdaman nila ang buong pwersa ng batas.

Ang krimen na ginawa kay Christine ay paglabag sa karapatan niyang mabuhay at isang malaking paglapastangan sa dignidad niya bilang isang babae. Kung kaya’t napakahalaga na patuloy nating labanan ang mga pananalita, gawain, at sistemang lumilikha ng kapaligirang mapang-abuso at marahas sa mga kababaihan lalo pa ngayong Buwan ng mga Kababaihan.

Pinapaalahanan din namin ang lahat na maging mapanuri sa mga kumakalat sa social media. May mga oportunistang naglalabas ng mga mali at pekeng impormasyon laban sa CHR para sakyan ang emosyon ng publiko sa pangyayaring ito. Hindi ito nakakatulong para makamit ang hustisya para kay Christine Lee. Bagkus, ito ay nakakainsulto sa kanyang alaala. Lumilihis ito sa katotohanan at nagpapabagal sa pagtukoy ng mga konkretong hakbang para ito’y hindi na maulit pa.

Pagtulungan nating lahat, partikular ang mga may mandato sa gobyerno, na magkaroon ng ligtas na kapaligiran para sa lahat ng babaeng teenager at ibang bulnerableng sektor. Tiyakin natin na hindi na maulit pa ang nangyari kay Christine.
Tanging sa katotohanan lamang makakamit ang tunay na hustisya para sa kanya at sa iba pang mga babaeng naging biktima ng karahasan.